BALIAN TENUNG, Kratak krotok kapas kapuk …

            

 Ada tuturan satua anak menyama ajaka dadua, ane kelihan madan I Raga, ane cerikan madan I Sarira. I Sarira ngelah kone ya sampi lua berag aukud. Sedek dina anu I Sarira ngangon di tegalan. Kacarita I Raga anak mayus tur corah pesan. Ditu lantas pesu kenehne tan rahayu. Kene kenehne “deweke tusing payu mabelanja, melahan sampin adine tendasne paling”. Ditu lantas I Raga mamaling sampin I Sarirane, tur engkebanga di sungane kaja-kangin.

            Caritayang jani I Sarira nelokin sampine, dapetanga tusing ada di pategulan. Ditu lantas ia mulih, morahan teken belinne ”beh beli, icang negulang sampi di tegale, itunian mara delokin icang laut ilang. Tegarang ja beli nenungin!”. Ditu lantas mesaut I Raga “nah kema adi ngae katipat gong, teken daksina, pipis satak seket, mabaas akelo tengah!”.

            Caritayang jani suba pragat daksinane, lantas baanga belinne. Caritayang jani I Raga masee ngarepin daksina. Kene saseene ”kratak-krotok kapas kapuk raga ngemasin lara pati”. Lantas matengkem I Raga ngae-ngae  ngengsap “bapa lembu tua, apa tunasang bapa teken nira jero taksu?”. Lantas matur I Sarira “inggih jero taksu, tiang nunasang sampin tiange ical ditu”. Buin masee jero taksu “kratak-krotok kapas kapuk raga ngemasin lara pati”. Lantas matengkem jero taksu, tur ngandika “bapa lembu tua, sampin bapane kaja-kangin sig sungane”. Ditu lantas I Sarira nunas mapamit teken jero taksu. kanduksupatra.blogspot.com

            Caritayang jani I Raga suud masee, kenel atine maan baas akelo tengah, ketipat gong, teken pipis satak seket, sawireh anak mula mayus tur corah.

            Kacarita jani I Sarira, ngalih sampinne di sungane, sajan tepukina ditu. Lantas dandana abana mulih. Sasubanne neked di jalan, saget ada parekan Anak Agung lakar ngalih balian. Lantas matakon parekane “jero nandan sampi, dija ada balian tenung?”. Masaut I Sarira “tiang ngelah nyama madan I Raga, ipun dadi balian tenung tur sidi pesan”. Sampin tiange ilang ya nenungin”. Ditu lantas i parekan kumah I Raga. Suba neked ditu, dapetanga I Raga sedek negak. Lantas matakon I Raga teken i parekan “ih parekan apa cai kalih mai?”. Ditu lantas i parekan matur “inggih Jero Balian, “tiang nikanga ngarereh balian ring Ida Anak Agung. Ida Anake Agung kicalan ali-ali, jerone kapangandikayang nenungin, ngiring sane mangkin parek ka puri!”. Masaut I Raga ”nah lamun keto jalan tiang ngiring”.

            Gelising satua, majalan I Raga ka purin Anake Agung, lakar matenung, nanging kenehne jejeh, sawireh iya tusing balian ngaku balian.

            Kacarita jani suba neked di puri, dapetanga Anake Agung sedek malinggih, lantas Ida ngandika “ih jerone ane oranga dadi balian tenung?”. Matur I Raga “inggih titiang ratu Anak Agung”. Buin ngandika Anake Agung ”nah Jero Balian, jani jerone nenungin ali-alin panak nirane!” kanduksupatra.blogspot.com

            Caritayang jani Anake Agung ngandikaang panyeroane ngae banten, daksina telung soroh, ketipat gong, muah asaupakaran anake matenung. Panjake ne muani kapangandikaang ngae panggungan lakar tongos balinae masee, tur beten panggungane kandikang ngae gembong. Pakayunan Anake Agung, yan tusing bakat baana nenungin teken I Balian, I Balian lakar tuludanga mangdenne mati.

            Kacarita I Raga jani menek ka panggunganne, muanne barak biing tur masebeng jejeh, sawireh tusing balian ngaku balian, tur kene papinehne “jani sinah deweke lakar mati, tuludanga teken Anake Agung di gembonge, sig apine manilap sawireh i dewek belog mabet ririh”. Suud I Raga mapikeneh keto, lantas teka panyeroane ngajangin banten ka panggunge.

            Caritayang ada panyeroane corah ane mamaling alin-alin putran Anake Agung. Ditu ya keweh pesan kenehne, sawireh ada balian lakar menungin. Nuju padidine, i panyeroan lantas ngenggalang ya menek ka panggungane matur teken jero balian “inggih jero balian, tiang nawegang pisan ring jerone, punika ali-alin putran Anake Agung tiang sane mamaling. Nanging sampunan tiang aturanga mamaling, mangda jerone ngaturang taksun jerune sane nyelang!”. Keto atur panyeroane, tur kabaang lantas baliane ali-aline. Ditu lantas I Raga masalin semunne, mulana ucem dadi jenar. kanduksupatra.blogspot.com

            Caritayang jani I Raga masee di panggungane, kene saseene ”kratak-krotok kapas kapuk raga ngemasin lara pati”. Lantas matengkem jero balian “bapa lembu tua, apa tunasang bapa teken nira jero taksu!”. Lantas matur Anake Agung “inggih titiang nunasang ali-alin panak titiange ical”. Ngandika jero taksu ”ali-alin panak bapane taksun nirane nyelang”. Lantas edenganga ali-aline, tur ambila teken Anake Agung. Ditu lantas Anake Agung ledang pesan.

            Caritayang jani I Raga suud masee, liu maan kakalapan tur kaicen buin pipis teken Anake Agung. Gelising tuturan satua, lantas sugih kone I Raga ulian mapi-mapi dadi balian tenung.

#SatuaBali #BalianTenung #BudayaBali #MistikBali

Original-kanduksupatra.blogspot.com Karikatur:Wayan Sada / Sompret